تنوض فالليل تنوض صبح تلقــــــاهم مــــزال نــايضين


يقـــولوا كلام مــــا يصلح عليــــنا حنــــا الجــزايريين


ما خــــلاّوا لا لــــرواح لا لمــــوتـــا ولا لحــيـين


ماخــــلاّو حــــاجة تصلح علام ، تاريخ أو حتى دين


قبل ما نبدى.. نقـول الصح مـــــاشي قـــــاع المصريين


انمــــا قــصدي الجــيــّاح الـــي مـــاشي متـــربيين


قالـــوها نـــاس لبــارح القــوافــل يكونوا جـــايزين


او التـــافه يبـــــــقى يضبح مع احترامـــاتي اللــخرين


يا ربي نطـــــلب السمـاح عرب و خاوة ومسلــــــمين


ماشي معناه نضربوا النـح و يحسبــــوا رانـــا خايـفين


ودرك خلاص لقــدر طـاح وهـوما مـــزال امصممين


ما حبّــوش يطلبوا سماح اعــلى خــــاطر مغرورين


وماشي هــاذاك هـو الصـح العـيـب والـخصارة ساهلـــين


بــاش تكـون نـــاس ملاح الّي صعيـــــبة يــا مسكيـن


ماراحـش انقولك ارواح بــــاش تعـرف الجزيريين


على خاطر تعرف الصـح نتايا كثر من وحـدوخرين


نتم عــــاونتونـا بــالسلاح على كــــل حال مشكورين


وحنايا بعثنالكم ... أرواح راهــــم عنـــــدكم مدفونين


او فاللّــــخر كل شي راح على جـــال كأس العالمين


خــــاطر الـي راح يفرح هومــــا الأنس والشياطين


مــانيش راح نزيد جراح بيـــن الخــــــاوة المسلمين


انما ...نكـــتـــب الصح للأجيــال الّـــي طــالعين


بدات لحكايا فــــالمرواح كانوا للبليــــــدة جـــايين


قـابلناهم بالافـــــــــراح وردة وردة فــــاليــــدين


وادينـــــاهم كي السياح بالشرطة والـــــعســــاسين


لتم عرفونا نــاس ملاح وبلي حنـــــايا شبعــــانين


ومربيين تاع الصح وحتــى فلعبـــــنا فنــــانين


الاهداف كانوا صحـــاح او فــــي ثلاثة شـــرعيين


لتم بعدا بدينا لفراح وبتــــنا كـــــامل سهرانين


وهـــوما لتم بداوا النواح وحلفوا ماراهم ساكــتين


بداوا يسبوا ضربنا النح وكنا بــــالفرحة لاتيـيـــن


وقلنا كي تبرى لجـراح يسكتــــوا رام زعفانين


قالـــوا حوايـج ماتصلح او بلي مــاناش مسلــــمين


وكــأننا غلقــنا رفـــح وعــــاوننا الصــهيـونين


وبلي هومـــا الي افصح وهومـا ردونــــا عربيين


وبوعمامة والأمـير صح واقيلا كانــــــوا شينويين


ولحنوا نشــــــيدنا بصح نساو بلــــي الجزايريين


كانوا في وقت الكفـــــاح ومــاشي لاتيين بالتلحين


لحق الوقت تاع الصح.. كنــــا لبـــلادهم رايحين


رايحين او بالنا مرتــاح على خـاطر كنا رابحين


شحال من واحد منا راح ولحقوا حــتى المتغربين


كانواغير الناس لمـلاح او لعلامــــــات فاليدين


عنبـالـــهم راحوا سياح للقــــــاهرة حـــــواسين


ولتم الي القنــــاع طاح حقيـــــقـــة المصــرييـــن


بان البــاطل تاع الصح دارو عليـــــهم مــلايين


و الي مـاعندوش سلاح عنـــدو حـــجرة فــــاليدين


وزادو غد منداك صباح الحـــافلة تـــاع اللاعبين


الطوب او لحجـر تلاح سجّلوا ربعة مصـــــابين


بعــيـنيـــنا شفنا لجراح او شـــافوها الناس كاملين


اوهوما وجوههم صحاح قالــــك لالا كــــذابيــن


راهــم يلعبــوا المسرح جرحوا رواحهم باليــدين


او بلعـــــاني دمهم ساح على خــــاطر راهم حابين


يلعبــوا في كاش مراح مزّيـــا كانوا المـــراقبين


والفيلم كــــامل اتنفضح او شــــفنـاه كامل بالعين


و زادوا جـابولنا براح وجابوا شوّيا شطـاحين


وبقاو ايغنوا للصبــاح الليـلة مــاكمش راقـدين


وصباح ربي يـــا فتّـاح كنّـــا للمــلعب رايحين


دورونا حتى الليل طاح والله ماكــــــــم متدربين


لحق النهـــار تاع الصح الشبــــــان دخلوا خايفين


تسمع حــي على الكـفـاح ميـــات آلف ولا زايـديـن


من لخوف مطمورطاح او زيـاني تقــوشي مقنين


حتى وليد بـــاش جراح حليـش زاد خرج مسكين


او سعدان ضارب النح واش بيــــهم المصريين؟


واقيــــلا عمبالهم صح راهم فالثـــلاثة وسبعين


زاد كمّل المورال طاح سجلوا فالدقــــــايق لولين


زادوا فاللخريـن وصبح لحســـابـــات متسـاويين


ماعليش الامل ما راح او مـــازال رانا رايحين


نلعبوا فأرض الصلاح كيـما حنــــــايا مؤمنين


فالسودان يبـان الصح لهدرة لتـــــما فالرجلين


ماشي في لمواس وسلاح يـا مصاروا يا حقارين


بــوتفليـــقة لتم صـرّح ابعثــوا المشجـعين


بلا تذكـرة روح ورواح والتأشيـرات امنحــيـين


لتم شحال من واحد راح شباب كـــامل امعــولين


الجزاير اولاش السماح يا سعدان رانــــا جايين


والفريق ما حبش يرتاح قالك ما نكونوا مهنيين


حتى نشوفوا بلي صـح خرجنا من مصر سـالمين


لحقوا لأم درمان صـبح لقــاوهم كـامل مستنيين


فيديهم رافديـن لــواح ادخــلوهــــا آمنيـن


وان تو تري في كل مراح وعلى علامنا متداربين


خاطر عارفين بلي طاح عليه مليون ونص حرين


ولتما الفريـق ا رتاح وريحـــنا حنايا كامليـــن


السودان زاهية للصباح تســــــاند فالجزايـــريين


وفالقاهرة النـاس تشطح الغلابــــــا لمســاكيـــن


ضـربـوهم كـامل بلّـواح او سمحـــوا فـيـهم كاملـين


وخيّرو تاوع المسرح الفنــانـــات والفنـــانين


الي كانـت بكري تشـطـح جـــات تمـثل المصريـين


واش من لبسة وروايــح جـــايين كامل فرحــانين


لمـساكـن عمبـالهـم صح للمونـديـال راهـم رايحـين


وجمال عوّل يترشـح للانتخابات الجـــايـين


عمبالو خــلاص ربح وحط علاء ذراع ليميـن


ارواح للسـودان ارواح لحقوا صابو الجزيريين


فكل طريق فكــل سطح دنيا خضرة شمال ويمين


وزيد الوخدة تاع الصح أمعاهم حتــــى لخـــرين


هذا يغنـــي هــذا يشطح وان تــو تري سودانيين


بعدا الحكّـم غير سرّح بديـــــناهم واحـــد اثنين


حـبو يزيدو يـقضو صلاّح يسجـلــوا فالدقـايق لـولـين


قال مادام قاواوي راح نربـــحوهم بكــاش ثنين


حـــاولوا يهجموا بصح البنطـــاقي طالــع منـين


شاوشي فكرنا فسرباح وين يـــا مـش مهنـدسين


و بوقرة مكـاش السمـاح حبسوا هنايـا ويـن رايحـين


او زيـــاني بدى يطرح او مقني زيــــن الــــديـن


إمـا جـــاز ولا طاح ولا مــــا بيـــن الرجـلين


حليش حي على الكـفاح فكــــرني فــــــالمجاهدين


او غــــزال لـعبـوا يـفرح مـن أخـــــطر المهاجمـين


ويـبدة مازال ما صرّح ومازال سـرارو امخـبـيـين


او بالحاج أيـــــلا طرّح تقول التوربو فــالرجلين


ومنصـوري قايد ناجح او يـــا بزاز يـــا ياسين


او صايفي ما فـرا يـشطح ولا يــروح شمال ويمـيـن


أيـراوغ ....اويشبّـــــح ويـــــزيد يمرر الخرين


عنـتر يحـيى ويـن رايـح ؟؟؟ بـووووووووم فالـتسـعـين

.
فريـقنا الوطـــــني ربح كيفاش نوصف ذاك الحين


الجزاير زاهية للصبـح تفكــــرنا الثنيــن او ستين


وفي مصر بدى المسرح بداو يعيـطوا الكـــــذابين


راهم صــاريين المذابح بالمطــــاوي والسكــاكين


وهو فلوتـــال مريّح امسلمين و امكتـــفين


في حياتي شفت الجـواح ماشي كيــــما المصريين


نشكر كل واحــد روّح كامـــــل المشجــعيـن


دركـا عرفـوا تـاع الصـح شكـون هوما الجزايـريـيـن


ونشكر كل مــن ريّح فكــرســـي الاحتياطيين


كـل واحد فيــهم يصلح او ليّـام راهـــم جـايين


و روراوة الــي صلّــح صـــورتنا فـــالميادين


وفاللخر عــمّــــي رابح سعدان شيـــخ المدربين


او فيصل كرشوش صح ماعطاش ربي فالرجلين


بصح مايضـــربش النح على خاوتوا الجزايريين

ربي يهدينا ويصلح الامور نشاله

إسمحي لي بأن أبدي إعجابي بقلمك وأسلوبك الراقي والمتألق

شكرا على ردودكم