قرن فضة وققرن ذهب الجزء 4
وكي رجع خوها من الصيد قالتلو تعيش خويا هاذي آخر مرة نطلب منك طلب كيما هاذا بصح لازم تجيبلي الشجرة لي كل ورقة فيها تغني بغنية بسيف باه وافق خوها بصح مع الاخر قبل لأنو ما يقدرش يرفضلها طلب وهي واش بقالو فالدنيا والصباح راح جميل وزاد تلاقا مع نفس الشيخ وقالو ياويدي علاش زادت بعثاتك أختك هاذ المرة حكالو الحكاية الشيخ مالقا مايدير و حار في حب هاذ الاخ لأختو ودلو على الطريق وخبرو بلي يلقى سبع كبير وحكايتو نفس حكاية الحنش جميل تكل على وكمل طريقو حتى لقى السبع وتاني لقاه راقد زرب خطف غصن من الشجرة ورجع و هو راجع لبيتو تلاقى مع الشيخ بصح هاذي المرة قبل مايروح لدارو عطاه مرايا وقالو هاذي المارايا يا وليدي إذا طلبت منك اختك مرة اخرى ترجع لهاذ المكان اعطيهالها لانو هاذي المرايا عجيبة وتولي سوداء إذا جراتلك حاجة وتبقى صافية إذا ما صرالك والو
المهم رجع جميل لختو وعطالها الغصن غرساتو وبقات كل صباح تسمع لشجرتها وهي تغني وفرحت بيها بزاف و فالصباح التالي جميل رجع للصيد كي العادة والستوت راحت عند جميلة وهي تقول في قلبها خلاص تهنيت من هاذو الولاد بصح كي فتحت عليها جميلة الباب نخلعت وقريب ما حبس قلبها بصح دارت روحها فرحانة وزييد كي شافت الشجرة قريب ماتت بالغيرة وقالتها روعة تهبل بصح مازلت حاجة وحيدة خاصتها وهي الزاوش لي يهدر وراحت كي العادة ولات جميلة تستنى في خوها ومع وصل بدات تحاول فيه وتقلو تعيش خويا هاذي آخر مرة و الله ما نزيد نقلك جيبلي حتى حاجة قبل جميل مكره والصباح قبل ما يروح عطاها المرايا لي عطاهالها الشيخ وحكالها حكايتها هي المرة الاولى خافت عليه بصح قالت هاذي هي المرة الاخيرة وزيد ما صرالو والو وجميل ودع ختو وراح في طريقو وزاد تلاقى مع نفس الشيح قالو يا وليدي خير هاذ المرة علاه زدت وليت وزاد حكالو جميل حكاية العصفور قالو ياوليدي مهمتك هاذي المرة واعرة بزاف وباه تحكم هاذ العصفور لازم عليك تكون صبور لانو هاذ العصفور مكار بزاف والمكان لي فيه مليان حجر وفالحقيقة ماهومش حجر تاع الصح هوما العباد لي حاولو يحكمو هاذ الزاوش وما قدروش وتحولو حجر وباه ماتوليش كيفهم لاازم عليك تصبر عليه حتى يرقد وقبل ما يرقد هو يحاول يخدعك ويغني راني رايح نرقد شكون لي حاب يحكمني ويحط راسو تحت جناحو وما تسرعش باش تحكمو خليه زمان و مبعد روح ليه ، جميل شكر الشيخ الطيب وكمل طريقو حتى وصل للمكان لي قالو عليه الشيخ وتخبى وراء حجرة من الحجرات ومنين شاف العصفور حط راس تحت جناحو راح ليه باش يحكمو بصح العصفور طار وجميل تحول لحجرة والصباح كي ناضت جميلة لقات المرايا كحلة ظلمة بدات تبكي وتعيط بصح تشجعت ولحقت خوها وهي فالطريق لقات نفس الشيخ لي تلاقى مع خوها كي شافها قلقانة قالها واش بيك يا بنتي حكاتلو الحكاية الشيخ قالها نتي هي أخت جميل يا بنتي باينة بلي تحبي خوك بزاف وتخافي عليه وانا راح نعاونك بته توصلي ليه شوفي كملي في هاذ الطريق حتى تلقاي حنش كبير ما تخافيش منووتزيدي تلقاي سبع تاني ما تخافيش منو حتى توصلي لحديقة مليانة حجر ثما تلقاي لازم تحكمي العصفور و هو لي يقلك كيفاه تسلكي خوك وراحت فالطريق لي. قالها عليها الشيخ وتخبات وراء حجرة وصبرت زمان حتى رقد العصفور وحكماتو وقاتلو بسرعة وريلي كيفاش نسلك خويا..........

اليوم تعبت و غدوة إن شاء الله نكملكم الحكاية
تصبحو على خير يا أعضاء الطاسيلي

قرن فضة وقرن ذهب #النهاية#
وريلي كيفاش نسلك خويا وواش من حجرة هو ،قالها العصفور أنا ما نعرفش واش من حجرة خوك بصح نعرف كيفاه نسلكو روحي جيبي طاس مليان بالماء الفضي وصبيه على الحجر و كل ماتصبي رايح يخرجل إنسان أمير ،فارس،ملك....... وأي حجرة من الحجرات قادرة تكون خوك دارت جميلة واش قالها عليه العصفور وراحت تصب الماء على الحجرات و كل مرة يخرج واحد حتى القطرة الاخيرة والحجرة الاخيرة خرج جميل
جميلة فرحت بزاف وحضنت خوها وركبو فوق الحصان تاع جميل و رجعو لبيتهم و كي لحقو للدار قالهم العصفور أنا نعرف يماكم و باباكم تاع الصح ولازم عليكم تعرفوهم وفالوقت لي العصفور يهدر مع التوأم دقدقت الستوت على الباب وهي متأكدة بلي جميل وجميلة خلاص ماتو بصح هاذي المرة ما خرجتس ليها جميلة هاذي المرة خرج ليها العصفور وفقسلها عينيها حتى طاحت فالنهر و ماتت ومبعد دخل العصفور للدار وقال لجميل لازم تعرض السلطان تاع المملكة وتوريلو هاذو العجائب لي عندكم لانو هو يحب بزاف هاذو الحوايج وافق جميل على طلب العصفور وراح وعرض الملك لدارهم والملك وافق على العرضة وكي شاف الماء الفضي والشجرة العجيبة بقى يستعجب و بعدها جابلو جميل العصفور وهاذاك العصفور سلم على السلطان وسرع و نزع القبعات لجميل و جميلة وقال للسلطان هاذو هوما ولادك ويماهم بريئة وما قتلتهمش فرحالسلطان بزاف بولادو وأخذهم وراح باش يجيبو يماهم أما العصفور راح عند خالاتهم الشريرات وقالهم بلي السلطان فاقلهم ومن الخوف الكبيرة رمات نفسها فالبير و الوسطانية كانت توكل فالحلوى وبلعتها دفعة وحدة وجافت وماتت
ومن هاذاك اليوم وعائلة السلطان عايشة في سعادة وهناء

وهذي هي الحكاية سمحلي خويا المايسترو اذا طولت عليك باش تحطها فالكتاب مي هي طويلة بزاف

لا داعي اختي اعلم القصص طويلة

بارك الله فيك وجزاك كل خير