khaled.dz
2012-09-19, 19:12
في يوم عاصف و ممطر اشتريت زوج دلاعات وكيلو بطاطا وكيلو بصلة وقازوزة حمود بوعلام تاع 1 لتر و قررت نروح عند سعيدة الحظ رانية نخطبها.. نروح نخطب الفتاة اللي ديما كنت متمنيها طيبلي البوراك في رمضان في دارنا .رانية اللي ديما نكتب اسمها بدمي على الثلج كي يصب..رانية اللي ديما قلبي يسقسيني عليها ويقولي حرام عليك تبعدني على قلبها.. دخلت انا لدارهم مع الشيخ تاعنا فاستقبلتنا هي وامها وناناها وابوها ..امها كي شافتني حامل البطاطا فرحت وقاتلي واحد مايدي بنتي غيرك... انت برك اللي نمدهالك وافقت ديركت..كثر ربي خيرها المسكينة ..لكن ناناها ما وافقتش وقاتلي انساها لخاطر انت ديما نشوفك تهدر مع البنات من البالكون .. قلتلها لالا جامي هدرت مع طفلة في حياتي ...انا كنت امام تاع مسجد وكي شفت وجه بنتكم ماقدرتش نقاوم الزين النادر هذا ..وحاجة اخرى واحد ماطلب رايك وانت بالذات لازم يكون عندك احساس وشعور فني باه تفهمي ..قلتلها بنتكم باختصار راهي جمرة تكوي وسط قلبي هي تسميني الكبدة وانا نسميها العمر ما نقدرش نعيش في الدنيا بلا بيها ومانقدرش ننساها غير لانساتني الدنيا وتفكرتني الاخرة فنظرت ليا رانية وقالتلي دير ايدك في ايديا و هيا نفوتو قدام عديانا. و كي قعدت مع باباها قالي احكيلي على نفسك شوي ...قتلو انا انسان متواضع وناس ملاح و فحل و في راسي عايش ذيب وحقي نقدر نجيبو من فم الصيد و في غابة نقدر نعيش وحدي طرزان ونعيش بنتك طرزانة معايا في سعادة وهناء ..قالي الله يبارك مي لازم نسقسيك ياوليدي قبل كل شيء .. قالي واش اسمك ووين تسكن ؟ قتلو عندك الحق من حقك تسقسيني يا عمي. انا اسمي خالد ونسكن وين تسكن بنتك نسكن انا... ومبعد سقساني المسكين قالي وش تخدم يا بني ؟ قتلو رزقني ربي خدمة في الليل نكسب منها الذهب و الحمد لله. ...فرح و قالي مالا انت برك اللي تسعد بنتي ؟ قتلو أكيد...قالي واش تخدم ؟ قتلو يا سيدي انا خدمتي سرية وواحد ما يعرفها مي كي عدت نسيبي واب زوجتي المستقبلية اكيد نقولك. ...قتلو نقولك الصح و الصح راهو ربي ...قالي قولي ربي يحفضك يا وليدي .......قتلو تشكر خويا ... قلتلو يا الشيخ انا ديما في نص الليل نروح للمقبرة نخدم ....هو في قمة الدهشة قالي يا لطيف واش تخدم وواش دير في المقبرة في نص الليل؟ قتلو نخدم. قالي واش تخدم؟.... قتلوذرك نشرحلك كلش بالشوي و نفهمك بالعقل ... شوف كي نروح للمقبرة نخير القبور تاع العجايز الكبار و نحفرهم ....قالي ربي يستر لاه تحفرهم يا وليدي ؟ قتلو باه نجبد الذهب ...قالي وين راهو الذهب ؟...قتلو في فم العجوز الميتة لخاطر العجايز الكبار تلقاهم عندهم سنين وضروس تاع ذهب وفضة في فامهم باسكو كي يموتو يدفنوهم مع ضروسهم الذهبية ..وانا كي نحفر قبر العجوز نخرج راسها من القبر وننزعلها ضروسها كامل انا نقلعهم بالكلاب والمارطو بكل عنف ورومانسية.... الضروس تاع العضم ومانخليهمش في فمها و نقلعهم و نخبيهم سوفنير في الدار ...كي نقلعهم ونخلص مبعد نرجع المسكينة لقبرها نقرالها سورة الكرسي والفاتحة ونتركلها وردة بيضاء تاع بلاستيك في ايدها و ندفنها من جديد بالتراب ونبكي عليها شوي.. وفي الصباح ضروسها نبيعهم..خدمة هذي عندي عشر سنين وانا نخدم فيها ...... قالي ربي يستر. مي هذي راهي سرقة ياوليدي و اللي سرق حبة تشينة في صغرو يسرق طيارة في كبرو.. قتلو يا حسراه البلاد هذي ماربحتش وانا نصلي فيها كيفاه نربح وانا نغني فيها ؟راني علابالي راهي سرقة مي الله غالب ماتخافش ولادي ان شاء الله نربيهم تربية صالحة و نعلمهم الخيروالحلال و الصلاة و الربعة الاخرين وانت كي توافق نشريلك طومبيل و ان شاء الله نبعثك مع المدام تاعك للحج ولا العمرة ونفتحلك طابلة تبيع فيها الدخان والشمة للمواطن الجزائري ..مبعد وافق ابوها بشرط يكون مهرها خمسين مليون وانا قتلو مش خسارة فيها نبيع لحمي وكبدتي والمصارن تستاهل هي..قتلو باه نجمع المبلغ هذا لازم نحفر 200 قبر.قلتلو نديها كريدي و كي يفوت عام الفقر هذا راني نخلصكم... كي سمعت رانية خرجت تزغرت وتغني وتفرح من قلبها وتبكي دموع الفرح.. فاخرجت منديل من جيبي و اقتربت اليها و مسحت صباطي وهمست في اذنها وقلتلها كون ما وافقوش اهلك نخطفك ونذبحك.... وقلتلها ناناك عندها وحد ضروس غاليين في فمها يا ترى وكتى تتولاها المنية ونروح لقبرها نقرالها الفاتحة و نقلعلها ضروسها الذهبية ونزيدهم في شرطك؟ فنضرت اليا نظرة خبيثة بدات تبكي و تندب على راسها من شدة الفرحة وبكاتني معاها فاخرجت منديل من جيبي ومسحت دموع عيني الخضراء و منديل اخر و مسحت به صباطي ...فابتسمت ويالها من ابتسامة جذابة ... دمرتني بابتسامتها ....هههههههههه انتضرو قصة نهار العرس هههه